وچ ۽ ڏکڻ آفريقا جي 19 ملڪن، برونڊي، ڪوموروس، ڪانگو، جبوتي، مصر، اريٽيريا، ايٿوپيا، ڪينيا. لبيا، مڊگا سڪر، ملاوي، ماريشس، روانڊا. سيشليز. سوڊان، سوازي لئنڊ، يوگنڊا، زمبيا ۽ زمبابوي جي ملڪن تي ٻڌل هڪ واپاري اتحاد، جنهن جو مقصد ميمبر ملڪن جي پيداواري ذريعن کي وڌائڻ، علائقي جي ملڪن وچ ۾ سهڪار ۾ واڌ ۽ امن امان جي بحالي آهي. اتحاد جو بنيادي نعرو ”علائقا تعاون ذريعي معاشي خوشحاليءَ جو حصول آهي. اتحاد ۾ شامل ملڪن جي آدمشماري 40 ڪروڙن جي لڳ ڀڳ ۽ باهمي ڪاروبار جو دائرو 82 بلين ڊالر آهي ۽ اهو بيروني توڙي باهمي واپار جي حوالي سان آفريقا جو هڪ اهم فورم آهي. ڊسمبر 1984ع ۾ جڙيل هن اتحاد جي ترجيح، علائقي ۾ آزاد واپار، محصولياتي تعاون، ڪمپيوٽر ۽ ٻي سائنسي ٽيڪنالاجيءَ جي ڏس ۾ تعاون وڌائڻ، خانگي شعبي جي سهائتا ڪندي، کيس قانوني تحفظ فراهم ڪرڻ ۽ هڪٻئي کي فائدو ڏيندڙ معاشي ۽ ڪاروباري پاليسيون جوڙڻ آهي. انهيءَ ترجيح جي نتيجي ۾ علائقي اندر زرعي توڙي صنعتي پيداوار وڌڻ سان گڏ، مستحڪم منڊيءَ جو قيام، قدرتي وسيلن جو مناسب استعمال ۽ بهتر مالياتي سرشتن جو بنياد ممڪن ٿيو آهي. هن اتحاد کي واپاري ترقياتي بئنڪ (نيروبي) ڪليئرنگ هائوس (هراري) چمڙي جو ادارو (اٿيوپيا) ۽ انشورنس ڪمپني (نيروبي) سميت ننڍا وڏا ڪيترائي ڪمائتا متحرڪ شعبا آهن